Spennan nær hæstu hæðum: Hæst frumsýnt í Sjónvarpi Símans Premium 1. apríl
20. mars 2026
Ný íslensk þáttaröð sem ber nafnið Hæst verður frumsýnd í Sjónvarpi Símans Premium þann 1. apríl.
Ný íslensk þáttaröð sem ber nafnið Hæst verður frumsýnd í Sjónvarpi Símans Premium þann 1. apríl. Hæst fjallar um fjóra menntaskólakennara sem ákveða að leysa öll sín vandamál með því að ræna nemendafélag skólans. Mögulega gengur það ekki upp eins og þau sáu fyrir sér.
„Það er alltaf mikil eftirvænting þegar við setjum nýtt leikið íslenskt sjónvarpsefni í loftið. Við erum afar ánægð með útkomuna og bíðum spennt eftir viðbrögðum áhorfenda,“ segir Birkir Ágústsson, framkvæmdastjóri Miðla hjá Símanum.
Hlátrasköll og hraður hjartsláttur
Þættirnir fjalla um Njál (leikinn af Hannesi Óla Ágústssyni) sem er félagsfræðikennari og fjölskyldufaðir í fjárhagskrísu, ásamt Hólmari (leikinn af Friðgeiri Einarssyni), sögukennara með einstaklega sterkar skoðanir og takmarkað þol fyrir samtímanum. Með þeim í liði eru Ragna (leikin af Láru Jóhönnu Jónsdóttur), aðstoðarskólastjóri sem starfar undir hælnum á óhæfum skólastjóra, ásamt Bonní (leikin af Ásthildi Úu Sigurðardóttur), fyrrverandi vonarstjarna Íslands í knattspyrnu, sem glímir við erfiða fortíð.
Saman flækjast þau inn í atburðarás sem þau gera sér engan veginn grein fyrir. Þáttaröðin blandar saman gamni og spennu og dregur upp bæði fyndna og mannlega mynd af fólki sem eltir allar slæmu hugmyndirnar sem því dettur í hug.
Langaði að gera skemmtilegt íslenskt efni
Leikstjórar Hæst eru Freymar Þorbergsson og Einar Baldvin Arason. Handritshöfundar seríunnar eru Einar Baldvin, Hannes Óli Ágústsson og Katrín Björgvinsdóttir.
„Okkur hefur alltaf langað til að gera skemmtilegt íslenskt efni, metnaðarfullt og vel leikið þar sem gleðin er samt alltaf í fyrirrúmi,“ segir Einar Baldvin Arason, annar leikstjóri þáttanna.
Freymar Þorbergsson leikstýrir þáttunum með Einari en þættirnir eru sex samtals.
„Hvað er skemmtilegra en „heist“ myndir? Okkur fannst við að vísu ekki alveg komast upp með að vera með eitthvað „Las Vegas spilavítis rán“ á litla Íslandinu okkar svo tökum bara íslensku „dreyma stórt í lítilli tjörn“ á þetta og skipulögðum bara geggjað og vel útfært rán í menntaskóla,“ segir Freymar.
„Nú eru allar greiðslur náttúrulega komnar í posa en ég man eftir því þegar við vorum í skóla, þá vorum við og vinir okkar, bólugrafnir og drullustressaðir, að flytja nokkrar milljónir í peningum eftir miðasölu á skólaball í Bónus-plastpokum með Strætó út í næsta bankaútibú,“ bætir Einar við.
Þáttaröðin er framleidd af Skuggum og verður aðgengileg í heild sinni á Sjónvarpi Símans Premium frá og með 1. apríl.
